Sabiq rektor hazırda Bakı Ağır Cinayətlər Məhkəməsində hakim işləyən Hacı Ağababa Babayevlə görüşünü əks etdirən videogörüntüləri yaydı

Fəaliyyəti dayandırılmış Azərbaycan Beynəlxalq Universitetinin rektoru Elşad Abdullayev qəzətimizə növbəti müraciət ünvanlayıb. Müraciətdə öncə “Azadlıq”a əlindəki ciddi faktları ictimailəşdirməkdə yardımçı olduğu üçün təşəkkürünü çatdıran E.Abdullayev bildirir ki, onda olan daha bir videonu yaymaq qərarına gəlib.
Budəfəki video görüntü sabiq rektorun Bakı Şəhəri Nərimanov Rayon Məhkəməsinin sabiq sədri, hazırda Bakı Ağır Cinayətlər Məhkəməsində hakim işləyən Hacı Ağababa Babayevlə görüşünü əks etdirir.
«Mənim əvvəlki müraciətlərimi dərc etdiyiniz və göndərdiyim vidematerialları yaydığınız üçün Sizə təşəkkürümü bildirirəm. Sizin vasitənizlə bir daha oxucularınıza çatdırmaq istəyirəm ki, mənim məqsədim qardaşım Mahir Abdullayevin Azərbaycanda fəaliyyət göstərən mütəşəkkil cinayətkar təşkilat tərəfindən oğurlanmasının təfərrüatlarını ictimaiyyətə çatdırmaq və bu işin açılmasına nail olmaqdır.

Əvvəlki müraciətlərimdən sonra Azərbaycan prezidenti İlham Əliyevin sərəncamına əsasən 4 oktyabr 2012-cü il tarixdə Azərbaycan Respublikası Baş Prokurorluğunda qardaşım, Milli Təhlükəsizlik Nazirliyinin zabiti Mahir Abdullayevin oğurlanması faktına görə, başlanmış cinayət işinin istintaqını aparmaq məqsədi ilə Müstəqil İstintaq Komissiyası (MİK) yaradılmışdır. Bundan sonra, mən bui şlə əlaqədar şəxsi təşəbbüsümlə topladığım sübutları MİK-ə təqdim etmişəm. Bu sübutların bir hissəsi əvvəllər də mənim tərəfimdən hüquq-ümhafizə orqanlarına təqdim olunsa da, təəssüf ki, 9 il müddətində 12 müstəntiq heç bir araşdırma aparmamış, tədbir görülməmişdir və bunun üçün Azərbaycan prezidenti İlham Əliyevin siyasi iradəsinin zəruri olmasını qeyd etmişlər. Məndə belə bir təsəvvür yaranır ki, MİK də bu sübutları araşdırmaq üçün lazımi tədbirlər görmür, hər halda onun fəaliyyəti arzu etdiyim səviyyədə deyil.

Hazırda MİK-ə təqdim etdiiym sübutlardan biri də Bakı Şəhəri Nərimanov Rayon Məhkəməsinin sabiq sədri, hazırda Bakı Ağır Cinayətlər Məhkəməsində hakim işləyən Babayev Hacı Ağababa Fərman oğlu ilə söhbətimizin video və audio yazılarıdır. Bu materialları mən 2 mart 2009-cu ildə rəsmi qaydada, protokol ilə MTN-in əməkdaşı Rəsul Rəsulova vermişəm və bunu əks etdirən video kaseti MİK-ə təqdim etmişəm...
Mən, hakim Hacı Ağababa Babayevlə söhbətimiz əks etdirilmiş video görüntülərindən birini Sizə göndərməklə onu yaymağınızı xahiş edirəm. Hesab edirəm ki, bu görüntünün yayılması nəinki istintaqa mane olmayacaq, əksinə onun obyektiv aparılmasına və daha da sürətlənməsinə kömək edəcək”, - deyə E.Abdullayev müraciətində yazır.
Sabiq rektor hakimlə söhbətinin 2007-ci ilin iyuluna təsadüf etdiyini bildirir.



E.Abdullayevin yaydığı videogörüntülərdəki söhbətin stenoqramını təqdim edirik:

Ağababa Babayev:
- Nə isə, keçək mətləbə, vaxtım azdır, məni gözləyirlər.

Elşad Abdullayev:
- Hacı, qadanı alım, qardaşımı ver də...

- Sənin qardaşını Allah qoysa... Mən bunlarla görüşdüm, altıncı günün söhbətidir...
- Vilayətlə, yoxsa Ramillə?

- Vilayətlə. Dedim ki, sizinlə qurtardım mən. Siz mənə ayın 3-də verməliydiniz bunu. Əvvəl dedilər ki, ayın 2-də bayramdır, qalsın 3-nə. Dedim ki, axı mən də adamlara söz vermişəm. Bir epizod vardı, heç deməmiş, qəsdən onu rədd elədim, buraxdım. Mühüm əhəmiyyət kəsb eləyirdi onlar üçün. Özü də demişdilər mənə əvvəlcədən. Dedim ki, artıq 8-ci ildir ki, nə demisiniz, demişəm, “baş üstə”. Olub elə? Dedi, olub. Bir manat istəmişəm? Bir şey eləmişəm? Dedi, yox. Yaxşı, mən də sizdən bir şey xahiş elədim, indiyə qədər eləməmişdim. Əgər mümkün deyilsə, mənə deyin ki, sən qarışma, otur yerində. Dedim ki, mən də heç bir şey bilmirəm, amma mən deməmiş, sən dedin ki, hər şey yerindədir, sağ-salamatdır. Soruşdum ki, düzdür? Dedi ki, düzdür. Sonra, dedim ki, bəs bunu buraxmaq məsələsi... Dediniz ki, narahat olma, onu verəcəyik sənə təhvil. Dedim ki, axı mən də bu insanlara söz vermişəm. Bəlkə bu insanların fikrindən başqa şey keçirmiş, amma mən demişəm ki, mənəm ortada, heç nə eləməyin, heç yerə getməyin, bu uşağı verərlər sizə gec-tez. Indi də bir aydan yuxarıdır, bu gün-sabah, bu gün-sabah... Mən də insanam, mənim də üzüm var...

- Iki uşağı var, ayıbdır. Bir qardaşım Türkiyədə xəstəxanada, bacım Leyla Şıxlinskaya xəstəxanasında. Canım üçün, hamısı əsəbdən...
- Mənim də nüfuzuma xələl gəlir, belə çıxır ki, mən yalançı olmalıyam? Nə isə, çox söhbətimiz oldu. O gün görüşəndə axırıncı dəfə dedi ki, bəs, fikirləşirik, onu nəyin bahasına olursa olsun, birtəhər verək məhkəməyə, açıb buraxsınlar, elə siz özünüz həll eləyin. Dedim ki, yaxşı, bəs iki ildən sonra, üç ildən sonra...

- Üç il səkkiz ay...
- Üç il yarımdan sonra... Sabah nə deyəcəksiniz? Indi nə düzüb-qoşacaqsız? Sabah bəs soruşmayacaqlar ki, bu bir belə harada, niyə yatıb? Bəs bu hara getdi belə? Dedi, yox, elə onun üçün çalışırıq. O, sözü elə onun üçün atdı... Mən də dedim ki, yox, bu, təmiz çıxmalıdır, öz işinə-zada qayıtmalıdır. Əgər bunun əməlində bir şey varsa, deyin. Mən hesab edirəm, bunlar bu neçə vaxtdır fırlatmaqda, istəyirlər ki, bir şeylə versinlər məhkəməyə, sonra biz də buraxaq çıxıb getsin. Mən tutdum da bunu ki, bunlar bunu belə saxlamaqla neyləmək istəyirlər. Onu da dedim ki, almısan, eləmisən, öz yerində. Bu qədər də olmaz da, ayıbdır axı... Ya mənə de ki, qarışma, mən də gəlim deyim ki, qardaş, mənim işim deyil, mənə imtina elədilər. Dedim, siz də dediniz ki, baş üstə, indi də eləyin də. Keçən beşinci gündən məsələlər bərk şişib. O adamı ki mən tutmadım, onların dediyini, həmin məsələdə də iki milyon pul var idi...

- Həmin məsələdə? Bizdəki kimi...
- Yox, başqa cür idi. Götürmüşdülər ki, onun pulu var, qalmalıdır burada. Açıq bəllidir, pulunu almağa. 2 milyon dedilər gətir. Vermirlər, qalsın burada. Yaxşı, qalsın e, qalsın. Sən də bunu elə də...

- ...
- Milyonlar e, nə danışırsan sən? Zülfüqarov qardaşlarından 5 milyon aldılar. Bu gün tutdurdular mənə, aldılar, 20 gündən sonra buraxdırdılar. Denən, 5 qəpik mənə verdilər?
Yaxşı, indi də bu insan nə qədər çəkməlidir bunu? Bütün nəsil, ailə xəstələnib. Neyləmək lazımdır burada?
Sabah, sabah ikinci gündür, ya birisi gün mən gedib Ramillə görüşəcəyəm. Bilirsən, məsələ başqa cürdür. Mən məsələni qoymuşam, o da məruzə eləyib, Ramil də deyib ki, ağsaqqala de, bir görüşək. Bəlkə də bu gün oldu, sabah oldu, məni çağıracaq. Bu niyə belə oldu, olmadı... Başa düşdün?

- Balamın canı üçün, hacı, sabah yox, birisi gün ayın 13-də olur 3 il 8 ay.
- Aydındır. Indi görək nə deyir mənə. Indi o məhkəmə məsələsi ki var... Söhbət açılacaq da orada. Açılsa, deyərəm ki...

- Denən, bunun işçisini bir ildə dörd dəfə tutduz, “krupnı” pulunu aldız. Axırda dedilər ki, nə danışırsan, təzədən gətirməlisən. Gördüm ki, abırsızlıq, həyasızlıq olacaq, getmədim. Hacı, qardaşımı göndərdim. Bildim ki, bunlar elə bəhanə axtarırlar. Qardaşımı göndərib bunları yola verdim. Amma adamda insaf yaxşı şeydir də... Dörd dəfə məni belə aldadıb o pulu da alıblar.
- Bu gün-sabah bu məsələ həll olunmalıdır, 100 faiz. Ya belə buraxmalıdırlar, ya da... Indi mən ya sabah, ya da birisi gün görüşəcəm. Ya da məhkəməyə verəcəklər işi.

- Hacı,...
- Dedi, bəlkə elə sizə verdik, siz yoluna qoyduz. Elə bir söhbət də işlətdi.

- Hacı, ən yaxşısı elə belədir. Ən yaxşısı, de ki, ver, mən yoluna qoyaram. Məhkəməlik eləmə. De ki, bunun adamını bir ildə dörd dəfə ilişdirmisən, pulunu alıb yoluna qoymusan. Ayıbdır axı...
- Elə bilirsən demirəm? Vallah deyirəm. Uje mən... Allaha and olsun, bunlarla cəng edirəm. Allah qoysa, ya sabah, ya birisi gün özü çağırmalıdır nazir məni. Mənim məqsədim budur ki, təmiz çıxsın.

- Amma sən situasiyaya fikir ver, görsən ki, bunlar başqa yol tutmaq istəmir, ver məhkəmə ilə. Sonra biz “opravdaniya” qazanarıq.
- O, sonrakı işdir. Mən bunların “qarın ağrısını” tədricən yumşaltmaq istəyirəm. Yavaş-yavaş məhkəməyə-filan... Gücüm çatmasa, görsəm ki, mümkün deyil...

- Denən hörmətinizi-zadınızı eləyək, buraxın bunu, çıxıb getsin evinə, sən Allah.
- Qardaş canı, demişəm ki, gedin “hörmətinizi” də alın, nə istəyirsiniz alın...

- Eləmişik də, vallah eləmişik.
- Mən məsələni sərt qoymuşam, ikinci çıxış yolu yoxdur. Indi gözləyək...

- Məhkəmə yolu ilə deyəndə, hansı maddə ilə vermək istəyirlər?
- Bilmirəm, hansı maddə ilə vermək istəyirlər.

- Bunlara nə var e...
- Dələduzluqdan-zaddan verərlər...

- Milyon dənə maddə var.
- Əşşi, maddədən çox maddə var. Dələduzluq verərlər, bunlar üçün ən yaxşısı odur. Filankəsi aldadıb, filankəsə söz verib... Başqa nə eləyə bilərlər?

- De ki, bir-birimizə niyə hörmət eləməyək? Bir qardaşı hüquq elmləri doktorudur, bir qardaşı prokurorluq polkovnikidir... Hamısı vəzifəli adamlardır.
- Qardaş, mən yorulmuşam bunlarla. Yoldaşım da deyir ki, bunlar gündə sənə filan işi deyirlər, filan işi deyirlər. Bəs sən onların başını əzmirsən ki, bu nədir? Dedim ki, eləmişəm də bu səfər, indi fırlanırlar...

- Baş var ki, əzəsən?!
- O gün rədd elədiyim işdəki adamı “povtornı” məhkəməyə vermək istəyirlər.

- Utanmırlar e... Abırsız, həyasız adamlardılar da...
- Murdar adamlardılar e...

- Hacı, sən Allah, məhkəməyə qoyma, belə yola verək, çıxsın getsin.
- Yox, yox, mən özüm də istəmirəm.

- Denən bəs burda niyə oturmuşuq?
- Demişəm ki, axı mən adamlara söz vermişəm. Indiyə qədər heç kimə söz verməmişəm, heç kəslə məşğul olmamışam. Mən bunu bilməliyəm axı, sözümün üstündə durmalıyam. Bunlar da mənə hörmət eləyirlər.

- Denən, indiyə qədər bunun işçisini dörd dəfə tutub buraxmısan... Balamın canı üçün, nə pul istəyiblər, onu da vermişəm.
- Demişəm. Demişəm ki, qarant mənəm, bir kəlmə söz çıxsa, mənlikdir.

- De ki, paqon yoldaşınızdır, ayıb deyilmi? Bunlar adam deyillər e...
- Bunlar adam deyillər, vəhşidilər.

- Bunlarınkı vəhşilikdir.
- Vəhşilikdir, adam olsaydılar, nə vardı ki?!

- Heç Hitler belə eləməyib...
- Onlar bilirsən nətər şeylər eləyir, ay Elşad müəllim? Vallah, adam küsür, nifrət eləyir. Heç işləmək istəmirəm. Istəyirəm, çıxım oradan.

- Sənin bəxtindəndi, elə yerə düşmüsən ki...
- Özüm də bezmişəm, çalışıram ki, bir başqa sakit rayona gedim ki...

- Mən bilirsiz bayaqdan nəyi axtarırdım? Qardaşımın Ilham Əliyevlə bir yerdə şəkli var. Hadisədən üç gün əvvəl çəkilib. Üç-dörd dənə şəkil çəkdirib Ilham Əliyevlə.
- Gözü götürməyən adamlardır da. Sabah birdən mənim yerimə keçər...

- Təsadüfi adam olsaydı, Ilham Əliyevlə onun şəkli olardımı?
- Yox əşşi, təsadüfi adamla onların nə işi var...